ILOILO CITY – Ginreklamo sang isa ka balo ang intelligence operative sang Jaro Police Station sa Iloilo City bangud sa ginaalegar sini nga pagpamilit sa iya sang pulis nga mag-blow job kabaylo sang indi pagpatigayon sang drug operation.
Ginpahayag sa Bombo Radyo Iloilo ni Jona Cagbay, 32, sang Tabuc Suba, Jaro, Iloilo City nga nagapaguwa na siya sa ila puluy-an sang gab-i sang Hunyo 2 sang masugata si PO1 Ken Mark Canillo.
Suno kay Cagbay, nasal-an niya ini nga kasilingan rason nga iya ginbugno ang pulis apang nakibot ini sang ginmanduan kuno siya ni Canillo nga magbalik sa ila balay.
Ginmanduan kuno ni Canillo ang iya mga himata nga patyon ang cellphone kag ginhagad siya nga magsaka sa kuwarto agud lantawon kun may nabilin nga shabu ang ginpatay nga bana ni Cagbay.
Apang pag-abot sa kuwarto, ginpapili kuno siya sang pulis kun ma-blow job ukon tamnan siya sang ebidensiya nga iligal nga droga.
Dugang pa sang balo, ginpahog pa siya ni PO1 Canillo nga indi magpanugid kag wala makapangayo sang bulig sa mga kaupdanan.
Pagkatapos sang hitabo, naglakat man ang pulis apang determinado si Mrs. Cagbay nga pasakaan sang kaso ang pulis.
Si Cagbay ang misis sang gin-salvage sadto nga drug personality nga si Andrew Cagbay.