Handa nga magpalab-ot sang bulig ang Mandurriao Police Station kun kinahanglan sang iban nga ahensya sang gobyerno kaangot sa ginakahangaw-an nga pagdamo sang Chinese nationals sa Iloilo City.
Ginpahayag ini sang hepe sang estasyon nga si Police Captain Val Allan Cambel matapos na-mensyonar ang Monterosa Subdivision sa Mandurriao nga isa sa mga lokasyon sa syudad nga ginatiniran sang madamo nga Chinese nationals.
Sandig ini sa nakasaad sa sulat ni Iloilo City Lone District Rep. Julienne ‘Jamjam’ Baronda sa Department of Justice sang ginhingyo sini nga imbestigaran sang National Bureau of Investigation kag Bureau of Immigration ini nga nationals bangud sa ginapahayag makaduluda nga pagtinir sa syudad sang mga tawo halin sa mainland China, indi halos makahambal sang English, nakabakal sang mga balay sa balor nga P30-million tubtub P50-million, kag may yara man sang luxury nga sports utility vehicles (SUVs).
Sa interview naman sang Bombo Radyo kay Cambel, iya ginpahayag nga isa lamang ka supporting agency ang PNP kag may mga nagakaigu nga ahensya nga amo ang nagatutok sa pag-account sa sini nga nationals.
Wala pa sang tikang nga ginahimo subong sang pulis suno pa sa natungdan ilabi na bangud wala man sang na-report nga iligal nga mga aktibidad nga nahimo ang amo nga mga indibidwal.
Ginpahayag man sini nga isa ka tuig sini nga pagpungko bilang hepe sa Mandurriao Police Station, wala pa ini naka-encounter sang Chinese national nga involved sa anuman nga insidente ukon krimen.
Apang bangud matunog subong nga gina-istoryahan ang Chinese nationals sa Pilipinas kun sa diin involved pa ang national security, nagpanugyan si Cambel sa publiko kag sa barangay officials nga magpakig-angot gid gilayon sa otoridad pananglitan may makit-an nga makaduluda nga mga aktibidad sa palibot nga ginakaulamiran sang sini nga mga nationals.
SULAT NI BARONDA SA DOJ
Matandaan nga sa sulat ni Baronda kay Justice Secretary Jesus Crispin Remulla, namensyonar man ang Puerto Real de Iloilo kag Ledesco Subdivision sa La Paz.
Apisar nga suspetsa pa lamang ang tanan suno kay Baronda, mas maayo kun i-validate ini kag tumuron kun ini nga mga tawo ang nagapakigbahin man sa iligal nga aktibididad.
Gin-cite man sini ang ginakahangaw-an subong sang mga Pinoy nga Chinese “sleeper agents”; ang kaso ni Bamban, Tarlac Mayor Alice Guo nga nagguwa nga isa gali ka Chinese national nga si Guo Hua Ping; kag ang kaso sang 17 ka Chinese nationals nga nadakpan anay sa ginaalegar nga cybersex den sa Balantang, Jaro sang Nobyembre 2023 nga gina-alegar involved man sa human trafficking.
“While these are mere suspicions, it is better to validate the veracity of these reports and determine whether these alleged Chinese are engaged in nefarious activities or not, as the Filipino people are worried about the so-called Chinese sleeper agents given the fact that your agency, the National Bureau of Investigation, has verified that Mayor Alice Guo and a Chinese national have the same fingerprints. Also, in November 2023, 17 Chinese nationals were arrested in Brgy. Balantang, Jaro, here in Iloilo City due to cybersex and human trafficking,” kabahin sang sulat sini lang nga Hulyo.
Bilang pagtapos sang sulat, ginplastar sang mamalidha ang safety sang mga Ilonggo kag ang importansya sa pag-proteher sa national security sang Pilipinas.
“Given these, I would like to respectfully request that your good office investigate this matter through the National Bureau of Investigation and Bureau of Immigration in earnest. We want to ensure that our people are safe and that our national security is protected.”#
