ILOILO – Yara na sa estable nga kondisyon ang mga pulis kag Persons Deprived of Liberty (PDL) nga sakay sang natumba nga patrol car sang Balasan Municipal Police Station sa Barangay Luca, Ajuy, Iloilo.
Sa interview sang Bombo Radyo kay Pol. Lt. Danilo Noca, hepe sang Ajuy Municipal Police Station, iya ginpahayag nga halin sa Barotac Viejo Regional Trial Court ang patrol car sang gulpi lang nga naglupok ang tuo nga goma sang salakyan.
Bangud sang natabo, natumba ini sa karsada kag nagpalanakit ang lawas sang mga nakasakay.
Lakip sa gindala sa ospital amo ang mga preso nga sanday Rey Aguillar kag Dexter Baldia kag ang Balasan MPS personnel nga si Patrolman Ermirito Aquiño.
Nahibaluan nga sakay man sang patrol vehicle ang duha pa ka pulis nga sanday Patrolman Erwin Abaring kag Patrolman Kim Ryan Magcuyao.
