ILOILO CITY – Ginpaandaman ni Police Regional Office 6 (PRO6) director C/Supt. Cesar Hawthorne Binag, ang mga personalidad nga may kaangtanan sa napatay nga top drug lord sa Western Visayas nga si Richard Prevendido.
Suno kay Binag, ginatun-an pa sang cybercrime division sang PNP ang tatlo ka mga laptops kag 6 ka mga celpphones nga nakuha gikan sa puluy-an ni Prevendido.
Ginpahayag ni Binag nga ang mga ngalan sa laptops kag cellphones ni Prevendido ang mangin sunod nga target sang otoridad.
Wala sang luwas suno kay Binag, pulis man ukon pulitiko, nga makita sa listahan sang napatay nga drug lord.
Mabaskog nga ebidensiya ini suno sa PRO6 director para manabat ang mga may kaangtanan kay Prevendido.
Magaserbe man ini nga paandam suno kay C/Supt. Binag para sa mga pulis kag pulitiko nga drug pushers.