Ginmando na sang PNP ang maabtik nga imbestigasyon kag pagpasaka kaso batok sa isa ka police corporal sa Taguig City bangud sa ginaalegar pagmolestiya sa bata nga babaye.
Nag-ugat ang kaso sa reklamo nga ginpasaka batok sa nasambit nga pulis nga assigned sa Taguig City Police Substation 4.
Suno sa iloy sang biktima, natabo ang insidente sang Hunyo 21.
Gin-alegar sang iloy nga ginhikap sang pulis ang nawong sang walo ka tuig nga bata kag ginhalukan pa ini samtang ginasiling nga mas matahum ang bata sang sa iya asawa.
Nagtuga ini sang kahadlok sa bata.
Ginapangatubang sang pulis ang kaso nga paglapas sa Republic Act No. 11313 ukon Safe Spaces Act, kaangot sa Republic Act No. 7610 ukon Special Protection of Children Against Abuse, Exploitation and Discrimination Act, kag grave misconduct kag conduct unbecoming of a police officer.
Samtang padayon ang imbestigasyon sa kaso, ginkakas anay ini sa pwesto.
