Nagbulig ang mga pulis sa pagbun-ag sang isa ka iloy samtang nagalaslas ang anay Super Typhoon Pepito sa Barangay Datag, San Andres, Catanduanes.
Base sa report sang San Andres Municipal Police Station, natabo ini sang nagalibot ang mga personnel sa barangay para sa ocular inspection ukon pag-check sa sitwasyon sa lugar agud malantaw kun may naguba nga mga balay, imprastraktura, dalan, kag iban pa.
Samtang padayon ang inspeksyon, may nagpalapit sa pulis agud magpangayo sang bulig nga madala sa ospital ang babaye nga manugbata.
Nag-responde ang otoridad kag ginkadtuan ang balay nga indi man tuman ka layo sa highway.
Pag-abot sa balay, nagaguwa na sang gamay ang bata kag wala nagduha-duha si Patrolwoman Cahriel Ann Tabirara nga magbulig ilabi na bangud isa man ini ka registered midwife kag nurse.
Sang nakaguwa na ang healthy baby boy, gindala ang mag-iloy sa Juan M. Alberto Memorial District Hospital (JMAMDH) kaupod ang Municipal Disaster Risk Reduction and Management Office (MDRRMO).
Isa sa pinakaapektado ang Catanduanes sa pag-abot ni Pepito sa Pilipinas. Sa Panganiban, Catanduanes ini nag-landfall sang nagligad nga Sabado sang gab-i kag lima pa sa anum ka isolated areas sa probinsya ang nagapabilin nga isolated (as of press time).
