OTON, ILOILO – Nakaguwa na sa presohan ang pulis nga ginapahayag naghana nga magtaya sang pusil sa isa ka tricycle driver sa Oton, Iloilo.
Ang pulis amo si Police Corporal Virgilio Rojo, 34, assigned sa Iloilo City Mobile Group.
Sa interview sang Bombo Radyo kay Police Staff Sgt. Alex Beny Esteves, imbestigador sang Oton Municipal Police Station, iya ginpahayag nga indi na interesado ang tricycle driver nga si Rexie Bactol nga magpasaka pa sang kaso batuk sa pulis.
Suno kay Esteves, nagamaneho sang tricycle si Bactol sang nag-overtake ang salakyan nga ginamaneho ni Rojo.
Ginapahayag nga ginmanduan ni Rojo ang tricycle driver nga magdulog kag nagpakilala pa si Rojo nga isa siya ka pulis.
Wala man nakahibalo si Bactol kun nga-a ginpadulog siya sang pulis bangud wala man siya sang traffic violations.
Ginapasuni nga ginpahog pa ni Rojo si Bactol nga tiruhon.
