ILOILO CITY – Ginsaysay ni PO1 Dorben Acap Jr. kun ano ang matuod nga natabo sang adlaw nga siya ang gintuyo nga patyon sa Baeangay Dulunan, Arevalo, Iloilo City sang nagligad nga adlaw.
Sa exclusive interview sang Bombo Radyo kay Acap, iya ginpahayag nga antes pa man ang pag-ambush sa iya, may ihibalo na siya tuhoy sa tuyo nga pagpatay sa iya.
Sang natapos na ang iya duty sa Kampo Delgado alas-4:00 sang hapon sang Miyerkules, may nakita siya nga tatlo ka mga suspetsado nga sakay sa duha ka motorsiklo.
Gintuyo pa ni Acap nga patalangon ang mga suspek sa diin wala siya nag-agi sa iya kinaandan nga ruta sa pagpauli.
Samtang nagamaneho sang iya kotse, ginapreparar naman ni Acap ang iya pusil agud luthangon ang mga suspetsado.
Pag-abot sa Dulunan, Arevalo sa diin may yara sang traffic congestion, hinali lang nga nag-cross sa iya atubang ang isa ka motorsiklo sa diin sakay ang duha ka suspetsado.
Napilasan siya suno kay Acap sang apat ka beses nga nagpalupok ang mga suspestado.
Nakabalos ang pulis sang magpalapit sa iya salakyan ang mga suspek nga nakamotorsiklo tubtub nga iya naigo ang backrider kag gunman nga iya ginkilala kay PO2 Melvin Mocorro.
Nagapati naman ang abiktima nga may nagsugo kay PO2 Mocorro agud magpatay sa iya.
Apang indi man mahambal ni Acap kun ano ang motibo nga siya ang gintuyo nga patyon.
Ginpahayag sang pulis nga nagapati siya nga yara ang iya pangalan sa listahan sang mga likidaron.
Nahibaluan anga ginakabig si Acap nga high value target bangud sa ginapahayag kahilabtanan sa illegal drugs.
Apang nagpamalibad man si Acap nga hingadlan kun sin-o ang iya ginapatihan nga nagatuyo magpatay sa iya.
Madamo siya sang natapakan suno kay Acap samtang naga-perform sang iya duty bilang pulis.
Hugot naman nga ginpanginwala ni Acap nga involve ini sa iligal nga druga apisar ginakabig siya nga high value target.
Gindula man ni Acap ang mga huring-huring nga daan nga hiligut-anon kag road rage ang motibo sa krimen.
Ini bangud nga indi man sila personal nga kilalahay ni Mocorro kag wala man sang may natabo nga road rage sang adlaw nga siya ang gintuyo nga patyon.
Ginhingyo naman ni Acap sa Philippine National Police (PNP) nga hatagan siya kag ang iban pa nga pulis nga naulamid sa illegal drugs nga makapaathag.
Kuntani suno sa pulis, hatagan siya sang kahigayunan nga makapaathag kun matuod gid man nga isa siya ka durugista.
Kasubo panumdumon suno kay Acap nga amat-amat na nga nadula ang pagsalig sang publiko bangud sila mismo sa PNP ang nagapinatyanay.
Matapos ang natabo, ginhingyo man ni Acap kay PO2 Mocorro nga ituad kun sin-o ang utok sa tuyo nga pagpatay sa iya.