ILOILO CITY- Ginpaidalom na sa parrafin test ang pulis nga ginapahayag nag-suicide sa kagulangan sa Brgy. Damilisan, Miagao, Iloilo.
Ang biktima amo si Patrolman Marvin del Castillo,27, tumandok sang Devera, Sara, Iloilo apang temporaryo nga nagaistar sa Purok 2, San Joaquin, Iloilo,kag isa ka police trainee nga assigned sa San Joaquin MPS kag nagapaidalom sa Pre Basic Internal Security Operation Course (BISOC).
Sa interview sang Bombo Radyo kay PCapt Marvin Buenavista, hepe sang Miagao Municipal Police Station (MPS), iya ginpaathag nga katuyuan sini nga mapat-od ko nagpalupok gid man sang pusil ang biktima.
Una na nga ginpaidalom sa ballistic examination ang narecover nga armas-luthang kag mga basiyo sa lugar kon sa diin nasapwan ang pulis.
Suno kay Buenavista, natalana man nga ipaidalom sa autopsy si del Castillo.
Pahayag sang hepe, ila ginatutukan ang tanan nga anggulo sa kaso samtang wala pa makumpirma kon naghikog gid man ini.
Isa man sa ginalantaw nga anggulo amo ang pag-intra kag pagka-hook sang biktima sa online sabong apang ini ang padayon pa nga ginausoy sang otoridad.
