Ginpaguwa na sa kustodiya sang Philippine National Police (PNP) ang anay police major nga amo ang primary suspect sa pagkadula sang beauty queen kag teacher nga si Catherine Camilon.
Suno kay PNP chief Police General Benjamin Acorda Jr., ginpaguwa si Police Major Allan de Castro bangud sang nagligad nga semana, ginsipa man ini pahalin sa serbisyo sa hanay sang kapulisan.
Apisar sini suno kay Acorda, magapadayon ang PNP sa pagmonitor kun sa diin magkadto si De Castro agud mahapos nga madakpan pananglitan may warrant of arrrest na nga i-isyu ang korte para sa iya.
Oktubre 2023 sang nadeklarar nga missing si Camilon sa Batangas. Sa amo man nga bulan, ginpaidalom si De Castro sa Regional Personnel Holding and Accounting Unit sang PRO 4A kag ginhingadlan nga isa sa mga persons of interest sa pagkadula sang beauty queen.
Siya man ang naga-guwa nga tabuon kuntani sang biktima antes natabo ang insidente.
Sang nagligad naman nga semana, ginkumpirma ni Police Regional office (PRO) 4A chief Police Brigadier General Paul Kenneth Lucas nga ginpahalin na si De Castro sa serbisyo epektibo sang Enero 16.
Ang gin-cite nga rason amo ang conduct unbecoming of a police officer bangud sang gin-alegar pagpakigrelasyon sini kay Camilon apisar nga kasado ini sa lain nga babayi.
Magluwas diri, may napasaka man nga kaso nga kidnapping kag serious illegal detention complaints batok kay De Castro, iya driver-bodyguard nga si Jeffrey Magpantay, kag duha ka John Does.
Una naman nga ginpahayag sang mga pulis nga sandig sa panaysayon sang mga testigo, nagaguwa nga posible patay na si Camilon.
Matandaan nga nag-sorry lamang si De Castro bangud nga naulamid ang pangalan sang PNP sa kaso apang magluwas diri, wala ini sang tinimok-timok sa iya kaangtanan kay Camilon, kun matuod nga sila ang may kahimuan sa krimen, kag kun sa diin na ang lawas sini.#
