ILOILO CITY – Gina-imbestigaran na sang Iloilo City Police Office (ICPO) ang pulis nga ginatudlo nagapanag-iya sang drug kag prostitution den nga gin-raid sang damlag lang sa North Baluarte, Molo, Iloilo City.
Ginpahayag ni ICPO spokesperson Senior Insp. Shiela Mae Sangrines sa interview sang Bombo Radyo nga ginmanduan na si PO3 Wilfredo Tagle nga magsumite sang written explanation.
Si Tagle ang assigned subong sa Iloilo City Public Safety Company apang una na ginpanginwala ang akusasyon.
Suno kay Sangrines, gina-imbestigaran na sang Investigation and Detective Management Section (IDMS) sang ICPO ang kaso ni Tagle kag kun mapamatud-an nga may sala, magapangatubang sang nagakaigo nga silot ang pulis.
Nahibaluan nga nadakpan ang utod ni North Baluarte Punong Barangay Allan Aurelio sang gin-raid ang nasambit nga drug kag prostitution den.
Suno sa barangay kapitan, siya mismo ang nagpahibalo sa mga otoridad tuhoy sa iligal nga buluhaton sa drug kag prostitution den nga ginpaguwa sang nagapanag-iya nga pulis, nga boarding house.