𝗜𝗟𝗢𝗜𝗟𝗢 𝗖𝗜𝗧𝗬 — Daw ginlamon sang duta ang pulis nga naka-assign sa Distrito sang Molo matapos ini nga nabaligyaan sang salakyan sang magkahagugma nga carnapper.
Sa interview sang Bombo Radyo kay Police Lieutenant Geronimo Gano, Deputy Cop sang Molo Police Station, iya ginkumpirma nga naghalin sa ila nga katapo ang pulis nga nabiktima sang magkahagugma nga carnapper.
Suno kay Gano, ginbaligya pa sang ila katapo nga pulis ang iya daan nga salakyan agud mabakal ang amo nga unit sang salakyan.
Ginpahayag man sini nga nabakal sang pulis ang salakyan sa balor nga P365,000 halin sa P450,000 matapos sini nga ginhayu-an sa magkahagugma nga carnapper.
Ginpaathag man sang natungdan nga nahibaluan lamang sang pulis nga nabiktima siya, sang nagkoordinar na ang orihinal nga tag-iya sang salakyan sa iya.
Natumod man sang pulis nga siya ang nainto-an bangud lain ang pangalan nga nakasaad sa peke nga mga dokumento kaangay na lamang sang deed of sale kag “car registration and official receipt” ukon ORCR.
Natukiban man nga ang orihinal nga security paper ang may yara sang watermark, apang sa ginpakita sang mga carnapper, wala sang watermark nga nakasaad sa amo nga papel.
Nakit-an man nga nakasaad sa peke nga dokumento ang pangalan nga ‘Paula Lopez Uy’ nga ginapahayag, ginhimo-himo lamang sang magkahagugma nga suspek.
Ginpaathag man sang Molo Police Station nga ang lalaki lamang ang pulis sa mag-asawa nga una ginpahayag nga nabiktima sang modus sang magkahagugma nga carnapper.
Kun balikan, una na nga nagdangop sa Bombo Radyo Iloilo ang orihinal nga nagapanag-iya sang salakyan kag ‘rent a car’ business nga si Christine Joy Poneles agud mapanabat ang mga carnapper.
Matandaan nga ginrentahan lamang sang magkahagugma nga carnapper ang salakyan, apang natukiban nga ginbaligya nila ini sa isa ka pulis, rason man agud nga maghimo sang legal nga tikang ang origihinal nga tag-iya.
