Temporaryo nga ginsipa sa puwesto ang isa ka police officer nga assigned sa Marikina City Police Station matapos ma-involve sa viral video nga pagbangga sini sa firetruck.
Epektibo Enero 23 sang gin-relieve ini sa pwesto samtang ginapatigayon ang imbestigasyon.
Nagpagwa naman sang show cause order ang Land Transportation Office batok sa drayber kag rehistrado nga tag-iya sng Toyota Vios nga gin-gamit sa insidente.
Sa video, makit-an nga nagpondo ang salakyan sa atubang sang fire truck kag ginbanggan ang paglabay sini.
Ginmanduan ang driver nga mag-atubang sa LTO Intelligence and Investigation Division sa Enero 29.
Base sa imbestigasyon, nagsugod ang insidente sa isa ka indi paghangpanay sa karsada sa Pasig City kag nagresulta sa baisay sang pulis kag driver sang truck.
Apisar may yara na sang settlement sa tunga sang pulis kag tag-iya sang volunteer fire truck, ginpanindugan sang kapulisan nga magapabilin ang ila administratibo nga tikang.
Ginsaylo ang involved nga pulis sa Station Headquarters Support Unit kag ginpangayuan man sang paathag sa insidente.
Ginpaidalom naman sang LTO sa alarm status ang salakyan kag ginsuspinde ang driver’s license sang pulis sa sulod sang 90 ka adlaw.
