Ginrelieve ukon ginpahalin sa pwesto si Police Corporal Rodante Lopez, operatiba sang Iloilo City Police Station 1 – Station Drug Enforcement Team nga amo ang nag-ako sa pagpalupok sang armas-luthang sa diin napatay ang nasal-an nga subject sa drug buy bust operation sa Barangay North Baluarte, Molo, Iloilo City.
Ang biktima amo si Karl Daniel Bolante, 27, kag residente sang nasambit nga lugar.
Samtang ang matuod nga subject amo si Dave Mendoza, 23 anyos sang Rizal Pala-Pala 2, Iloilo City Proper.
Sa interview sang Bombo Radyo kay Police Lt. Col Joem Malong, spokesperson sang Police Regional Office VI, iya ginpahayag nga ginre-assign na subong sa Regional Personnel Holding Administration Unit (RPHAU) si Lopez.
Suno kay Malong, ginahulat na lamang nila ang direktiba sang Regional Internal Affairs Service (RIAS) 6 kun i-relieve man sa pwesto si Police Captain Shella Mae Sangrines nga amo ang commander sang Iloilo City Police Station No.1 nga nagpamuno sa operasyon.
Pahayag sang pulis, mahimo nga madugangan pa ang mga operatiba nga pahalinon sa pwesto sa tion nga makapasa na ang RIAS 6 sang resulta sang ila motu proprio investigation ukon kaugalingon nga imbestigasyon sa natabo nga drug buy bust operation.
