ILOILO CITY – Nakapiyansa na ang pulis nga ginpasakaan sang frustrated murder matapos ginluthang ang kasubong nga pulis sa Guimaras.
Nahibalu-an nga bangud sa kahulugbon, ginluthang ni Police Corporal Erwin Ferrer si Police Staff Sergeant Jeremy Minerva, lunsay na-assign sa Guimaras Provincial Mobile Force Platoon.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga yara sa kustodiya sang Provincial Holding and Accounting Unit si Ferrer samtang yara naman sa maayo nga kahimtangan si Minerva.
Suno kay Malong, padayon pa ang imbestigasyon tuhoy sa natabo nga insidente apang ang maathag lang amo nga kaso nga frustrated murder ang ginapangatubang ni Ferrer.
Magluwas diri, nagapangatubang man sang administrative case ang duha ka pulis nga mahimo magresulta sa dismissal santo sa resulta sang imbestigasyon ilabi pa nga naka full alert ang bug-os nga hanay sang Philippine National Police subong nga holiday season.
Kun tuhoy naman sa indiscriminate firing, ginpahayag ni Malong nga pila na ka tuig nga wala ginabutangan sang nozzle tape ang service firearm sang mga pulis.
Suno kay Malong, indi na kinahanglan nga liwat-liwaton ang pagpahangop kun ano ang nagakadapat kag ang indi dapat sa trabaho.
Dismissal ang silot sa mga madakpan nga nagapatigayon sang indiscriminate firing nga peligroso para sa tanan.
Pabor para sa law enforcement unit kun madayon ang ginaduso nga dulaon na ang ceasefire.
Suno kay Malong, humalin sang una, wala nagasunod sa ceasefire ang rebelde nga grupo.
Isa lamang ka halimbawa sang pag-traidor sang rebelde nga grupo amo ang pag-ambush sa convoy sang 1st Iloilo Provincial Mobile Force Company sa Tubungan, Iloilo.
Sa subong suno sa natungdan, yara sa defensive mode ang law enforcement unit bangud sa Suspension of Offensive Police Operation bilang pagsunod sa ceasefire tubtub sa Enero 7, 2020.
