ILOILO CITY – Napasaka na ang kaso nga murder batok kay PO1 Christian Kenneth Senon, ang pulis nga nagpatay kay PO1 Melchor Casipe Jr.
Ini ang ginkumpirma ni S/Insp. John Paul Guay, hepe sang Janiuay Police Station.
Sa interview sang Bombo Radyo, ginpahayag ni Guay nga kaina sang aga sang ila gin-file ang kaso batok kay Senon sa Iloilo Provincial Prosecutor’s Office.
Paathag ni Guay, bangud sang mga sirkumstansiya kun paano ginpatay ni Senon si Casipe rason nga murder ang kaso nga ila ginpasaka.
Suno kay S/Insp. Guay, intensyon ni Senon nga patyon ang kaangay nga pulis kag may elemento sang pagtraidor bangud ginpatalikod sini ang biktima antes ginluthang.
Sanday PO1 Senon kay Casipe ang lunsay miyembro sang 602nd Regional Mobile Force Battalion.