Nakit-an na ang bangkay sang pulis nga nahulog sa sakayan-pandagat samtang nagalagas ini sa mga illegal fishers sang Miyerkules sang gab-i sa baybayon sang Guiwanon, Nueva Valencia, Guimaras.
Ang biktima amo si Police Staff Sergeant Mechael Gatinao, 42-anyos, kag residente sang Sitio Sirum, Brgy. San Nicolas, Buenavista Guimaras.
Sa interview sang Bombo Radyo kay Lieutenant Colonel Cecilia Julleza, chief sang Provincial Administrative Resource Management Unit, Guimaras Police Provincial Office (GPPO), iya ginpahayag nga nasapwan nga wala na sang kabuhi ang biktima sa Naoway Island, Sibunag, Guimaras.
Suno kay Julleza, mga manugpangisda sang nasambit nga isla ang nakasapo sa bangkay sang pulis, kon sa diin, gilayon man sila nga nagpakig-angot sa kapulisan.
Ginsaysay man sang natungdan nga nagpamukot ang mga manogpangisda agud nga madasig nga makit-an ang lawas sang biktima.
Gintumod man sini nga wala na nakit-an nga ginasuksok sang biktima ang iya nga long firearm.
Wala naman sang nakit-an nga mga pilas sa lawas ni Gatinao, apang may mga lagob ini nga naangkon sa iya nagkalain-lain nga parte sang lawas.
Nahibaluan nga masobra 15 na ka tuig nga nagaserbisyo bilang pulis si Gatinao kag masami nga nagaupod sa pagpatrolya sang bantay-dagat sa baybayon sang Nueva Valencia, Guimaras.
Kon balikan, sang 2021, ginkastigo-patay man sang onse ka mga illegal fishers ang isa ka bantay-dagat, kon sa diin, gin-abduct pa ini kag ginhaboy sa lawod sang Nueva Valencia.
Ang biktima amo si Nelson Bordon, residente sang Barangay Guiwanon, sang nasambit nga banwa.
Pebrero 27, 2021 naman sang nasapwan nga nagautaw-utaw ang bangkay ni Bordon sa baybayon nga sakop sang Malingin Island sa Barangay Guiwanon.
Santo man sa autopsy result, indi pagkalumos kundi mga pilas bunga sang pagkastigo ang rason sang kamatayon sang biktima.
