Wala gin-deny sang pulis nga nahulogan sang debris sa Ungka Flyover sa Pavia, Iloilo nga naglain gid ang iya buot bangud daw kaangay nga ginapaguwa nga butigon siya kasunod sang insidente.
Sa interview sang Bombo Radyo kay Police Staff Sergeant Frank Sanchez, Police Officer nga na-assign sa Police Regional Office (PRO) 6, iya ginpahayag nga samtang nagapatuman sila sang traffic jam sa Ungka Flyover, may nagtupad sila nga naga-angkasanay nga mag-asawa sakay sa motor, samtang sa piyak sini ang isa ka awto, kon sa diin, sa amo nga tion, gulpi lang nga may nagdulahog sa iya nga helmet.
Suno kay Sanchez, bangud sa tuman ka todo ang impact, abi niya ginsumbag siya ukon may nag-tripping sa iya.
Nakit-an man sini ang mga pudpod sang debris kon sa diin, nawas-ag pa sang natupa sa dalan.
Ginpahayag man sang natungdan nga gilayon siya naglibot agud nga magsaka sa flyover agud man komprantahon ang kontraktor.
Ginpamangkot man sini kon sa diin ang safety engineer sang proyekto agud kontani nga maistorya apang ang sabat sang trabahador amo ang naglakat ang ila engineer.
Nagdesisyon na lang ang pulis nga magpadulong sa Pavia Municipal Police Station agud nag magpa-blotter sa natabo nga insidente.
Nagpanidugan man si Sanchez nga ang iya presensya sa session ang pagpakita sang kinamatarong para sa mga motorista nga nabiktima kag nadagdagan man sang mga debris sang Ungka Flyover.
