Pulis nga nakabunggo-patay sa 19 anyos nga soltero sa Janiuay, Iloilo, nakaguwa na sa presohan; Pamilya sang biktima indi magpasaka sang kaso

Nakaguwa na sa presohan ang driver nga pulis sang Bingawan patrol car nga nakabunggo-patay sa 19 anyos nga soltero sa Barangay Matag-ob, Janiuay, Iloilo.

Ang biktima amo si John Emmanuel Gaje sang Barangay Calansanan, Badiangan samtang ang pulis naman nga nakabunggo amo si Police Corporal Nadje Castor.

Sa interview sang Bombo Radyo kay PCapt. Eleazar Climacosa, hepe sang Janiuay Municipal Police Station, iya ginpahayag nga ginkasugtan na lang sang pamilya nga indi na magpasaka sang kaso batuk kay Castor.

Apang kinahanglan lang sang pulis nga sabton ang tanan nga gasto sa pagpalubong sa biktima.

Nahibaluan nga padulong kuntani sa Iloilo Police Provincial Office ang mga pulis sang Bingawan Municipal Police Station sakay sa patrol car sang gulpyada nga nagtabok si Gaje kag wala ini matalupangdan ni Castor.

Nalab-ot sang side mirror sang patrol car ang biktima kag naigo ang iya ulo nga mahimo rason sang iya kamatayon.