ILOILO CITY – Ginpanginwala sang Chief Intel sang Police Station 1 ang kahilabtanan sa pagluthang sa chief tanod sang Zone 2, San Juan, Molo, Iloilo City.
Sa interview sang Bombo Radyo kay Police Staff Sergeant Ernie Arorong, iya ginpahayag nga wala siya sang kahilabtanan sa natabo nga krimen.
Suno kay Arorong, matuod nga may yara sila sang indi pag-intindihanay sang pamilya ni Tanod Commander Lemuel Villaruel apang nakahanda siya nga magpa-areglo.
Ginpahayag ni Arorong nga ang komosyon ang natabo sang 2009 kag kun luyag gid man niya nga magbalos sa pamilya Villaruel, kun tani madugay na siya nga nagbalos.
Bilang isa ka pulis suno sa natungdan, katungdanan niya nga dakpon ukon sawayon ang mga nagalapas sa layi.
Nahibalu-an nga una na nga ginpahayag sang pamilya nga may yara sang pulis nga nagahingabot sa ila pamilya sa diin sang una, ginsakit sang amo nga pulis ang minor de edad nga hinablos kag ginapahayag nga gin-plantedan sang illegal drugs ang utod ni Villaruel.
