Ginmandu sang National Police Commission (Napolcom) nga pahalinon sa pwesto ang pulis nga tag-iya sang pusil nga amo ang gin-gamit sang iya 14-anyos nga hinablos sa pagpangluthang sa sulod sang San Jose National High School sa Tacloban City.
Ginkilala ang pulis nga si Police Staff Sergeant Arla Ray O. Paciencia, naka-assign sa Regional Finance Service Unit 8 sa Eastern Visayas.
Napamatud-an siya nga guilty sa grave misconduct kag conduct unbecoming of a police officer may kaangtanan sa insidente sang Hunyo 22, 2026.
Suno sa Napolcom, bisan naka-duty si Paciencia sang amo nga adlaw, ginbilin niya ang iya service firearm sa ila balay kag gintago lamang ini sa sulod sang plastic gun box nga ginbutang sa plastic cabinet, sa baylo nga sa safety vault nga ginapatuman sang mga regulasyon sang Philippine National Police (PNP).
Dugang sa desisyon, ang pagpabaya sang pulis sa pag-atipan sang armas nga ginhatag sang gobyerno nangin bahin sang sunod-sunod nga hitabo nga nagresulta sa trahedya.
“The Commission ruled that her gross negligence in the custody of a government-issued lethal weapon set in motion the chain of events that led to the tragedy, and that her numerous awards and commendations, including on public safety, could not mitigate her liability but instead underscored the higher degree of care expected of her,” suno sa komisyon.
Lakip sa silot nga pagka-dismiss sa serbisyo amo ang pagkadula sang mga benepisyo kag permanente nga pag-disqualify sa pag-okupar sang bisan ano nga posisyon sa gobyerno.
“The unfortunate events in Tacloban and other parts of the country underscore the urgent need for stricter accountability. With this measure, we are reaffirming our standard: Every police officer must ensure their firearm is properly secured at all times in the interest of public safety,” suno naman kay Police Commissioner Ralph Calinisan.
Nahibaluan nga sa amo nga school shooting, duha ka mga menor de edad nga estudyante ang suspek; samtang tatlo naman nga lunsay man mga estudyante ang ginbawian sang kabuhi.
