Ginbawian gid sang kabuhi ang isa ka pulis sa Cavite samtang kritikal naman ang isa pa ka pulis matapos nga gintiro sang suspek nga bag-o lang nakagwa sa Iwahig.
Ini matapos niya gin- agaw ang service firearm sang isa sa mga pulis sa Carmona Cavite sang Miyerkules.
Pareho nga gindala sa ospital ang biktima nga si PMSgt Joel Mendoza kag PSSgt Joseph Martin Fabula, lunsay assigned sa Carmona Component City Police Station apang ginbawian sang kabuhi si Mendoza.
Napatay man ang suspek nga si alyas Oliver, 29-anyos, tumandok sang Basilan.
Sa report, gin-aresto ang suspek sa kaso nga Trespassing kag gindala sa Carmona Component City Police Station.
Pag-abot sa presinto, namalibad ang complainant nga magpasaka sang kaso batok sa suspek.
Kasunod sini, hinali lang nga nang-agaw ang suspek sang pusil ni Mendoza gani nag-agaway sila nga duha apang naglupok ang pusil kag naigo si Fabula.
Nag-angkon man sang tatlo ka igo sang bala ang suspek nga gintunaan sang iya kamatayon.
