ILOILO CITY – Patay ang isa ka pulis matapos nagsaka sa ulo sini ang rabies sang ido nga nagkagat sa iya sang ini ang 12-anyos pa lamang.
Ginkilala ang pulis nga si PO2 Benjamin Salomeo, 31, sang Dao, Capiz kag assigned sa Police Community Relations (PCR) sang Jaro PNP.
Sa impormasyon nga nakuha sang Bombo Radyo, gindala sa isa ka pribado nga ospital ang biktima sang tinalikdan nga semana pagkatapos magreklamo sang tuman ka sakit sang ulo.
Ginapahayag nga napabay-an sang pulis ang kagat sang ido sang ini ang bata pa kag subong lang nalab-ot sang virus ang iya ulo, rason sa pag-angkon sini sang encephalitis.
Ginpaathag naman sang isa ka eksperto kun nga-a subong lang nag-epekto ang rabies sa pulis, 19 ka tuig makaligad nga ini ang ginkagat sang ido.
Suno kay Dr. Elvin Tiangha, posible nga ginpabay-an lang ni PO2 Salomeo ang kagat sang ido sa kag wala gilayon nagpa-injection. Nagtinir sa lawas sang biktima ang virus kag subong lang naglab-ot sa ulo sini rason sang pag-angkon sang encephalitis nga gintunaan naman sang iya kamatayon.