ILOILO – Kaso kriminal kag administratibo ang igapasaka batok sa isa ka pulis bangud sa paglapas sa quarantine protocol.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga ang nasambit nga pulis ang residente sang Anilao, Iloilo, assigned sa Regional Personnel Holding and Accounting Unit kag detailed sa Regional Personnel and Records Management Division.
Suno kay Malong, una nga nakitaan sang sintomas sang COVID-19 ang nasambit nga pulis rason nga sang Agosto 15, ginpatigayon ang pagkuha sang swab sample para sa COVID-19 test kag sang Agosto 20 nakumpirma nga nagpositibo ini sa virus.
Ginpahayag ni Malong nga sang Agosto 18, nagpadulong sa Brgy. Daja sa banwa sang Maasin ang nasambit nga pulis agud magkuha sang manok kag nag-inom pa kaupod sa iya mga abyan.
Ang pagpasaka sang kaso administratibo suno kay Malong ang nabase sa memorandum order ni Police Lt. Gen. Camilo Cascolan nga nagaserbe nga deputy chief for administration sang Philippine National Police samtang ang pagpasaka naman sang kaso kriminal ang nabase sa Bayanihan to Heal as One Act.
May kaangtanan diri, ginpahayag ni Mayor Francis Amboy sang Maasin, Iloilo nga naglab-ot sa anum ang natumod nga direct contact sang nasambit nga pulis nga naka-facility quarantine na sa subong.
Ang anum ka direct contact suno kay Amboy ang yara na sa quarantine facility kag natalana nga kuhaan sang swab sample para sa COVID-19 test.
Ang nasambit nga pulis suno kay Amboy ang sadto anay na-assign sa Maasin Municipal Police Station rason nga madamo na ini sang abyan sa banwa sang Maasin.
Kun tuhoy naman sa pagpasaka sang kaso suno sa alkalde, nakadepende na ini sa Police Regional Office 6.
