Pilason ang isa ka pulis matapos nga nakabunggo ang ginamaneho sini nga motorsiklo sa isa ka depampasahero nga jeep sa Bangga Inas, Barangay Tranghawan, Lambunao, Iloilo.
Ang biktima amo si Patrolman Kurt Stephen Casiple, 29 anyos.
Ang jeepney driver naman amo si Rey Legaspi, 60, kag residente sang Brgy. Walang, Lambunao.
Sa interview sang Bombo Radyo kay Police Captain Winston Biadog, deputy chief of police sang Lambunao Municipal Police Station, iya ginpahayag nga padulong kuntani ang jeep sa Brgy. Inca, Lambunao kag pabalik naman sa Iloilo City ang motorsiklo.
Suno kay Biadog, madasig ang dalagan sang motorsiklo sang hinali lang nga nagliko pawala ang jeep, rason sang pagkabunggo sang motorsiklo sang biktima.
Bangud sa impact, nawasak gid ang motorsiklo ni Casiple kag naglupad pa ini kag naglapaw sa ibabaw sang jeep.
Masuwerte naman nga may suksok nga helmet ang biktima.
Padayon ini subong nga ginabulong sa ospital matapos nag-angkon sang injury sa iya paa.
Yara naman sa kustodiya sang otoridad ang jeepney driver.
