Nagpa-Bombo ang anak sang isa ka lalaki matapos nga matiruhan sang isa ka pulis nga nagresponde sa komosyon sa Sitio Camindez, Barangay Bancal, Carles, Iloilo.
Ang ginatumod nga pulis amo si Master Sergeant Michael Ilanga, naka-assign sa Carles Municipal Police Station.
Sa interview sang Bombo Radyo kay alyas Eden, anak ni alyas Edwin, nga natiruhan ni Master Sergeant Michael Ilanga, iya ginpahayag nga mas nauna ang pulis kag kaupod ang hinablos kag ang iya mga abyan nga nagsulong sa ila balay kag nagpangastigo sa pamilya.
Suno kay Eden, ginsugo niya ang iya manghod nga mangayo sang bulig sa iya amay nga nagakatulog, bangud kay ang mga tawo nga nagsulong sa ila balay ang armado.
Gilayon man nga nagkuha sang binangon ang ila amay kag didto na nag-umpisa ang kinagamo.
Dugang pa ni Eden, nagpalupok si Master Sergeant Ilanga sang makaduha ka beses kag padayon nga ginakastigo ang iya mga utod.
Nagapanindugan man si alyas Eden nga ginlabo lang iya amay ang pulis bangud nauna ini nga nagpalupok sang iya armas.
Ginkwestyon man sini ang indi pag-aresto sang kapulisan kay Master Sergeant Ilanga kag kaupod ang hinablos kag ang iya mga abyan.
Sa subong, nagapabilin nga naka ospital arrest si alyas Edwin.
