ILOILO – Nagsaka na sa 45 ang numero sang mga pulis sa Western Visayas nga nalatnan sang Coronavirus Disease 2019 (COVID-19).
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga ang duha ka mga pulis nga nagdugang ang lunsay na-assign sa Iloilo City Police Office.
Suno kay Malong, ang isa ka pulis ang may rangko nga Police Major samtang ang isa naman ang may rangko nga Police Master Sergeant kag lunsay residente sang distrito sang Mandurriao.
Ginpahayag ni Malong nga ang dugang nga COVID-19 cases ang bunga sang ginapatigayon nga mass testing sa hanay sang Philippine National Police.
Sa subong, 24 ang total active cases nga na record sang Police Regional Office 6, 20 ang naka-recover kag 1 ang patay.
