Importante nga mapaiway gid ang pulitika sa pagpatuman sang clearing operations sa mga dalanun sa kabarangayan.
Ini ang pahanumdom sang Public Order and Safety Management Office (POSMO) kasunod man sang ginaduso nga ordinansa sang Iloilo City Council nga barangay deputization agud mangin hilway ang mga dalanun kag malikawan ang road obstructions kag illegal parking.
Sa idalom sini, pagahatagan sang gahum ang opisyal sang barangay nga mag-isyu sang citation tickets kaangay sa mga salakyan nga naga illegal parking.
Suno kay Cyril Octavio, Chief Operation sang POSMO, sa tion nga may ara sang political consideration ukon ginagamit ang pwesto sa pag-target sang isa ka tawo, maapektuhan gid sini ang pagpatuman sang ordinansa.
Mahimo man nga ikansela ang deputization sa idalom sang kasugtanan sang ICTTMO kag barangay, kun mapamatud-an nga ginagamit ini sang awtoridad sa personal nga bagay.
Nahibaluan nga tinutuyo nga matapos ang guidelines sang nasambit nga ordinansa agud gilayon ini nga mapatuman sa bug-os nga siudad sang Iloilo.
