ILOILO CITY – Nakumpiska sang mga otoridad ang mga armas, bala, iligal nga droga kag mangin explosives sa puluy-an sang Bureau of Customs (BoC) broker sa Barangay Palaypay, Anilao, Iloilo.
Paagi sa search warrant, gin-raid sang mga otoridad ang puluy-an ni Raffy Lagamon nga wala maabtan sang raiding team sa iya puluy-an.
Ginpahayag sa Bombo Radyo Iloilo ni Punong Barangay Jose Hero Montaño sang Palaypay, Anilao, wala masami nagatinir sa ila lugar si Lagamon bangud may puluy-an man ini sa Alta Tierra Village sa Jaro, Iloilo City.
Nakuha sang mga otoridad sa puluy-an sini ang isa ka M16 rifle, isa ka 9mm, isa ka .22 caliber revolver, 80 ka live ammunition sang M16, 34 live ammunitions sang 12 gauge shotgun, isa ka granada kag 11 ka sachet sang shabu.
Gin-aresto naman sa nasambit nga raid ang caretaker sang puluy-an ni Lagamon nga si Romil Sumayo bangud sa pag-angkon sang 9mm pistol nga wala sang license to own and possess.
Si Sumayo ang anay prison guard sa Bureau of Jail Management and Penology (BJMP) sa Nanga, Pototan, Iloilo kag karon bodyguard ni Iloilo Board Member Domingo Oso Jr.
Paathag ni Sumayo sa interview sang Bombo Radyo, government property ang iya armas nga ginhatag sa iya sang prison guard pa ini sa BJMP.