ILOILO CITY – Isa ang patay samtang narekober ang pila ka mga armas sa raid nga ginpatigayon sa puluy-an ni Punong Barangay Noel Odicta sang Barangay Tanza Esperanza, Iloilo City kaina sang kaagahon.
Magluwas sa puluy-an ni Odicta, ginsulod man sang mga otoridad ang puluy-an ni Barangay Kagawad Samuel Rubinas, Gerry Odicta nga magulang sang punong barangay, Andrew Altas nga nagapakilala nga agent sang National Bureau of Investigation (NBI) kag bayaw sang barangay captain kag ang puluy-an ni Abraham Orada.
Patay si Altas matapos nga naigo sa ulo sang ginapahayag magbato sa mga otoridad samtang naigo man ang isa ka miyembro sang raiding team apang may yara ini sang bulletproof vest.
Sa interview sang Bombo Radyo, ginpahayag ni Supt. Jonathan Pablito, hepe sang Police Station No. 1 sa siyudad sang Iloilo, dungan nga ginserbe ang search warrant sa puluy-an sang lima ka mga subject.
Ang operasyon may kaangtanan sa ginapahayag paghupot sang mga subject sang armas.
Narekober gikan sa puluy-an ni Punong Barangay Odicta ang isa ka kalibre .45 nga armas kag MK2 grenade.
Ang punong barangay utod sang ginpatay nga ginapahayag drug lord nga si Melvin Odicta Sr.