Ginkumpirma sang pump boy sang isa ka gasolinahan sa Distrito sang Mandurriao nga nagbakal si Frank Rois Barbasa sang gasolina sa ila nga gasoline station.
Sa interview sang Bombo Radyo kay alyas Nonoy, ginabulubanta alas 7:40 sang gab-i antes may nasapwan nga sunog nga bangkay sa Greenmeadows Subdivision sa Pavia, Iloilo nagbakal sang isa ka gallon nga gasolina si Frank.
Suno sa iya, mga 3.5 liters lamang ang nasulod sa gallon, apang ginpahayag sang lalaki nga gusto niya magbakal sang kabug-osan nga 8 liters bangud gamiton sini sa iya nga salakyan.
Dugang pa sini nga nagpangita pa sila sang dugang nga suludlan agud nga makalab-ot sa 8 liters ang gasoline kag gintanyag pa ni Frank ang iya tumbler nga suno pa sa iya kun wala na gid sang suludlan didto nalang ibutang ang dugang nga gasolina.
Wala naman ginbaton sang pump boy ang tumbler bangud nanugunan ini nga isulod ang gasolina sa tubigan ni Frank, gani nagpangita pa sila sang dugang nga bulutangan.
Ginpahayag man sini nga wala nakalab-ot sa 8 liters ang gasolina kag yara lamang sa mga 7 liters ang ila nahatag kay Frank bangud wala na gid sang suludlan.
Matapos ang pagbakal sini nagbayad gilayon si Frank kag ginsulod sini gilayon ang gasolina sa back pack sini nga dala.
Yara na sa kustodiya sang kapulisan ang resibo sang ginbakal nga gasolina bilang kabahin sang ebidensya.
Ginkumpirma man ni Presquito nga may nakit-an sa cellphone ni Barbasa nga naga-search ini kon pila ka litro sang gasolina ang kinahanglan nga magamit agud mangin abo ang isa ka lawas sang tawo.
Ang cellphone ni Barbasa ang nakit-an malapit sa area kun sa diin nasapwan ang bangkay.
Natigayon nga nabuksan sang pamilya ang cellphone gani nga nakit-an kun ano ang gin-search sini.
