GUIMARAS– Nagkulob kag naglugdang ang isa ka pumpboat sa Brgy. Lawi, Jordan, Guimaras matapos maabtan sang pugada sa tunga sang kalalawran.
Ang nasambit nga pumpboat ang ginasakyan sang mag-amay nga Jason Vinson kag Catalino Vinson sang Nueva Valencia, Guimaras.
Sa interview sang Bombo Radyo kay Jason Vinson, iya ginpahayag nga hinali lang nga nagpugada sang yara na sila sa tunga sang lawod rason nga naglugdang ang ila sakayan.
Ang katig na gid lang ang ila gingamit agud makaluwas kag makapahigad.
Gilayon naman sila nga nagpangayo sang bulig ilabi pa nga ang pagpangisda lamang ang ila palangabuhian.
Ginabanta nagadangat sa P50,000 ang balor sang halit nga natuga sang insidente.
