ILOILO CITY — Tuman ang pagpasalamat sang tag-iya sang isa ka pumpboat matapos makit-an na ini sa bulig sang Bombo Radyo.
Suno kay Larry Noble (sa laragway) sang Brgy. Gines Miagao, Iloilo, nadula ang iya pumpboat sang tinalikdan nga mga inadlaw gani ginpapanawagan niya ini sa Bombo Radyo kahapon.
May mga nakakita sang amo nga sakayan sa Brgy. Sto Niño Norte Arevalo Iloilo City nga nagasibo naman sa paglaragway sa panawagan kag ginreport sa Bombo.
Nagcoordinate ang Bombo sa Criminal Investigation and Detection Group kaupod ang tag-iya kag gilayon ginpadulongan ang lugar.
Positibo nga gin-identify ni Noble ang iya sakayan nga duag yellow, may ribite nga blue kag puti, may hayahay sang pungsod kag may pinasahi nga design sang bugsay (daw kinatawo sang lalaki).
Sa pag-imbestigar sang Bombo Radyo nahibaluan nga nakalab-ot ang sakayan sa amo nga lugar matapos ginbaligya ini sang isa ka Nordan Dela Cruz sang Brgy. Poblacion South Oton, Iloilo, sa balor nga P15 Thousand Pesos nga nagpahayag nga kinahanglan gid sini ang kwarta tungod yara sa ospital ang iya asawa nga na-“Caesarian” pa.
Tungod man sa pagpangduha-duha sang nagbakal nga nagapanag-iya sang isa ka restaurant, ginkuhaan sang laragway ang amo nga lalaki amo man ang sakayan nga ginabaligya sini, kag ginpapirma sa kasulatan (yara man sa laragway).
Pasakaan naman sang kaso sang CIDG ang amo nga lalaki nga wala na nagpakita matapos ang insidente.