SAN ENRIQUE, ILOILO– Nagreklamo ang mga pumuluyo sang Brgy. Madarag, San Enrique, Iloilo bangud wala sila nadala sa lista sang benepisyaryo sang duta nga ginatindugan sang ila balay sa malawig na nga tinuig.
Sa interview sang Bombo Radyo kay Mr. Eleazar Tubungbanua sang naasambit nga lugar, iya ginpahayag nga wala na sila sang madangpan sa ila problema.
Suno kay Tubungbanua, halos 40 na ka tuig sila nga naga-istar sa lugar apang ang makatilingalahan kun nga-a wala nadala ang ila pangalan sa mga benepisyaryo.
Masakit lang para sa ila suno kay Tubungbanua bangud wala man nakatambong sa pagsinapol sa ila barangay ang bag-o nga mga benepisyaryo.
Ginkakibot na lang nila suno kay Tubungbanua nga wala sila nadala sa listahan sang nagkolekta sang bayad para sa titulo sang duta.
Ginpahayag man sang Department of Environment and Natural Resources suno sa natungdan nga ang 104 ka bag-o nga benepisyaryo ang santo man sa rekomendasyon sang barangay council.
Dako man ang posibilidad suno kay Tubungbanua nga mapahalin sila sa ila gina-istaran bangud sa free patency policy sang Department of Environment and Natural Resources.
