Nagapabilin sa evacuation center ang mga pumuluyo sang Sitio Morobuan, Barangay Compo, San Enrique, Iloilo matapos ginbaha ang ila lugar bangud sa wala untat nga pagbubo sang mamunog nga ulan.
Sa interview sang Bombo Radyo kay Jovylen Paca-oncis, residente sang nasambit nga lugar, iya ginpahayag nga naglab-ot na sa lebel sang ulo sang tawo ang tubig, kabangdanan nga kinahanglanan na sila i-rescue sang mga otoridad agud malikawan ang disgrasya.
Ginpahayag man ni Paca-oncis nga kun magtabuay ang tubig halin sa suba kag sapa padulong sa Jalaur River, nagatuga ini sang pagtaas sang tubig sa ila komunidad.
Pahayag pa ni niya, tuman nga naapektuhan sang tubig-bah ang ila mga talamnan kag produkto sa agrikultura.
Ginabulubanta masobra 100 ka mga indibidwal ang nagapabilin sa evacuation center samtang padayon ang pag-monitor sang mga otoridad sa mga nasambit nga lugar.
