ILOILO CITY- Kapin isa na ka bulan nga ginaantos sang mga pumuluyo sang Tubungan, Iloilo ang paghaklo sang aso gikan sa nagakasunog nga mga plastic nga basura sa Material Recovery Facility (MRF) sa Brgy. Bacan sa amo nga banwa.
Sa interview sang Bombo Radyo kay Vice Mayor Leo Taypen, iya ginpahayag nga nag-umpisa nga nasunog ang mga basura sa MRF sang tion nga nagatagiti ang init, tatlo ka semana na ang nakaligad.
Suno kay Taypen, gilayon man nila ini nga ginbombahan sang tubig apang wala gid ini napalong bangud posible nga indi malab-ot sang tubig ang pinakaidalom nga bahin sang mga basura nga amo ang ginahalinan sang baga.
Pahayag niya, indi man nila madali – dali nga ukayon sang backhoe agud mabombahan sang tubig ang source gid sang aso bangud nahamtang ang area sa banglid kag delikado ini para sa backhoe.
Suno sa opisyal,naghagan-hagan lang ang aso bangud sa pagbubo sang ulan sang nagliligad nga mga inadlaw.
Plano naman nila nga risguhan na lang sa masunod nga mga inadlaw kag ukayon ini gamit ang backhoe agud mabasyahan sang tubig kag mauntat na ang pag-antos sang mga pumuluyo.
