May yara sang salabton ang pungsod nga matukiban nga naglapas sa priority lists nga makaangkon sang COVID-19 vaccine gikan sa COVAX facility kag kinahanglan man nga magbayad para sa gindonar nga bakuna.
Ini ang ginpaguwa nga statement sang Gavi Alliance matapos ang mga opisyal sang Pilipinas kag isa ka aktor ang nakabaton sang first dose sang COVID-19 vaccine apisar nga wala pa natapos ang pagpangbakuna sa mga health care workers nga amo ang top sector sang priority list.
Suno sa Gavi, kun may yara sang ginbag-o sa ginhimo nga prioritization, nagakadapat nga ginapahibalo gilayon ang organisasyon sa diin kinahanglan nga dokumentado, rationalized kag may yara sang pamatuod.
Nagpasalig man ang COVAX, World Health Organization, kag ang Coalition for Epidemic Preparedness Innovations nga ila usisaon ang mga impormasyon nga wala nasunod ang prioritization sa dapat nga mahatagan sang bakuna.
Nahibaluan nga ang top priority sang vaccination batuk sa COVID-19 amo ang mga health care workers, ginasundan sang mga senior citizens kag iban nga sektor.
