𝗜𝗟𝗢𝗜𝗟𝗢 𝗖𝗜𝗧𝗬 — Ginsuhestyon ni Arnel Asturias, punong barangay sang Brgy. Punong, Lapuz, Iloilo City nga uboson kuha ang tanan nga salakyan nga naga-obstruct ukon iligal nga naga-park sa dalan sang Brgy. Loboc kag Mansaya, Lapuz, Iloilo City.
Ini kasunod man sang kamatayon sang isa ka lalaki matapos nga nakabunggo ang iya nga motorsilklo sa naka-park nga trailer truck sa nasambit nga barangay.
Ang biktima amo si Jessmark Gabral, 23-anyos, kag residente sang Brgy. Mansaya, Lapuz, Iloilo City.
Sa interview sang Bombo Radyo kay Asturias, iya ginkwestyon kon ngaa subong lang gintawag nga “obstruction” sang loilo City Police Office – Traffic Enforcement Unit kag Iloilo City Traffic Management Unit (ICTMU) ang isa ka trailer truck nga kon sa diin gintunaan na sang aksidente sang damlag lang.
Suno kay Asturias, indi lang ang mga trailer truck nga naga-obstruct ang pangkuhaon sa amo nga dalan, dapat tanan nga sahi sang salakyan nga iligal nga naga-park.
Ginpahayag man sini nga matapos naghilisugtanay ang Iloilo City Traffic Management Unit kag Committee on Transportation sang city council, natigayon nga nakuha ang trailer truck sa amo nga lugar lakip ang motor sang biktima nga nadisgrasya sa lugar.
Nagpanugyan naman si Asturias kay Police Lieutenant Ethan Estaya, head sang Traffic Enforcement Unit nga hulaton anay niya ang mangin desisyon ni Iloilo City Councilor Sedfrey Cabaluna bangud nagapati ini nga siya may mas masangkad nga ihibalo sa legal nga mga aspeto sang problema.
Nahibaluan nga nagpadulong ang pamilya sang biktima sa opisina ni Cabaluna subong nga hapon agud nga madiskusyonan ang mga masunod nga tikang nahanungod sa natabo nga insidente.
