Punong Barangay Corazon Coo sang Sinikway, Lapuz, gin-athag nga wala sang myembro sang NPA ang ila lugar

Gin-athag ni Punong Barangay Corazon Coo sang Sinikway, Lapuz, Iloilo City nga wala sang myembro sang New People’s Army (NPA) sa ila lugar.

Ini ang kasunod sang pagdeklara sang National Task Force to End Local Communist Armed Conflict (NTF-ELCAC) nga “cleared” na ang nasambit nga barangay gikan sa rebelde nga grupo.

Sa interview sang Bombo Radyo kay Coo, iya ginpahayag nga may yara lamang sang residente sa iya barangay nga katapo sang organisasyon nga amo ang Katilingban sang Imol sa Syudad kag indi man ini makabig nga rebelde nga grupo.

Ang mga “cleared” nga barangay sa impluwensya sang Communist Party of the Philippines (CPP) kag iban pa nga ginaalegar front organizations sini ang ginalakipan sang Barangay Ingore, Barangay Dungon A, Dungon B, kag Tacas sa Jaro kag Barangay Lapuz Norte sa Lapuz.

Nakabaton ang mga ini sang P20 million nga balor sang proyekto kag sa bahin sang Sinikway, ang nasambit nga kantidad ang gastuhon para sa solar panel streetlight, pagpakaayo sang drainage system kag magadonar man ini sang pondo sa syudad para sa bakuna kontra COVID-19.