ILOILO CITY – Gindepensahan ni Punong Barangay Edwin Divinagracia Sr. sang San Vicente, Jaro, Iloilo City ang iya mga residente nga amo ang ginadudahan nga nag-ransack sa karga sang truck nga ginapanag-iyahan ni Punong Barangay Woody dela Riarte sang Kauswagan, Iloilo City.
Sa interview sang Bombo Radyo kay Divinagracia, iya ginpahayag nga ang taytay nga narumpag ang sakop sang Brgy. Bakhaw sa distrito sang Mandurriao kun sa diin ang suba ang nagaserbe nga boundary.
Suno kay Divinagracia, wala sila sang kinamatarong nga magpinagusto sa pagpadulong sa lugar kun sa diin natumba ang truck nga gintuyo nga i-carnap sang wala pa makilala nga mga suspek bangud nga indi na ini sakop sang ila jurisdiction.
Sa pagkamatuod suno kay Divinagracia, gilayon nga nagresponde ang mga barangay tanod sa ila lugar sang nahibalu-an nga narumpag ang taytay matapos gin-agyan sang truck.
Kun tani suno sa natungdan, ginpabantayan ni Punong Barangay dela Riarte ang natumba nga truck bangud nga puno ini sang utan kag kararuton.
