Ginpa-Bombo sang isa ka babayi ang Punong Barangay sang Bugtongan, Dueñas Iloilo matapos sini gintapungol ang iya bana bangud nagpamalibad ini nga mag-bayle.
Ang nasambit nga insidente ang natabo kadungan sang pagsaulog sang fiesta sang amo nga barangay sang Enero 22, 2023.
Ang tagreklamo amo si Dialyn Pedregosa sang amo man nga barangay.
Samtang, ang ginreklamo naman amo si Punong Barangay Danny Pedregosa, may asawa, kag residente sang Barangay Bugtongan, Duenas Iloilo.
Sa interview sang Bombo Radyo kay Pedregosa, iya ginpahayag nga hubog ang punong barangay sang ginpalapitan siya sini, ginbutong kag ginhambalan nga baylehon sini ang kaangay man niya nga punong barangay.
Nagpamalibad ang tagreklamo kag nagpalagyo.
Suno kay Pedregosa, sang nagbalikid ini, ginpalapitan sang iya bana ang punong barangay agud nga pamangkuton kuntani.
Apang, hinali nalang ini nga gintapungol sang punong barangay rason nga nalipong ini kag nakaangkon sang pilas sa idalom sang nawala sini nga mata.
Gilayon naman nga gindala sa ospital ang bana ni Pedregosa, kun sa diin natukiban nga nabali ang tul-an sa ilong sini.
Bangud sang kinagamo, nagpa-blotter si Pedregosa sa Dueñas Municipal Police Station agud mapasakaan sang kaso ang kapitan.
Naghingyo man ang natungdan sang Certificate to File Action nagikan sa barangay nga isa sa mga requirement sang kapulisan agud makapasaka sang kaso, apang ginpabuyan-buyanan ini sang mga barangay officials.
Sa pagkadismaya sa nangin lihuk sang barangay, nagalaom si Pedregosa nga makuha na gilayon ang Certificate to File Action agud mahatagan sang igtalupangod ang natabo sa iya bana.
Bukas naman ang Bombo Radyo sa bahin sang Punong Barangay sang Barangay Bugtongan, Dueñas Iloilo.
