ILOILO CITY – Ginkumpirma mismo ni Punong Barangay Jonathan Altura sang South Fundidor, Molo, Iloilo City nga nagpositibo siya sa Coronavirus Disease 2019 (COVID-19).
Sa interview sang Bombo Radyo kay Altura, iya ginpahayag nga antes pa man siya nagpakuha sang swab sample, nakabatyag siya sang pag-ubo.
Suno kay Altura, wala siya sang ideya kun paano niya nakuha ang virus ilabi pa nga madamo siya sang bisita nga gina-atubang bilang barangay official.
Ginpahayag ni Altura nga antes pa man siya nakabatyag sang sintomas, gilayon na siya nga nag-quarantine sa ila balay.
May kaangtanan diri, ginpahayag ni Public Safety and Transportation Management Office head Jeck Conlu nga nagaserbe man nga focal person for COVID-19, padayon ang contact tracing kasunod sang pagpositibo ni Punong Barangay Altura.
Sa subong, wala pa sang tul-id nga detalye tuhoy sa close contacts apang ginakabig nga direct contact ang family members nga kaupod sang opisyal sa balay.
Bangud may sintomas, pagadal-on sa quarantine facility ukon i-admit sa hospital ang Punong Barangay.
