OTON, ILOILO – Ginpasakaan sang Criminal Investigation and Detection Group – Iloilo Provincial Field Unit sang duha ka kaso kriminal ang mga opisyal sang Brgy. Alegre, Oton, Iloilo bangud sa ginapahayag anomaliya sa pagpanagtag sang ayuda sa idalom sang Social Amelioration Program (SAP).
Ang mga opisyal amo sanday Punong Barangay Pedro Panique, Barangay Kagawad Riza Cruz, kag Barangay Staff Joan Nombreda.
Sa interview sang Bombo Radyo kay Pol. Lt. Col. Gervacio Balmaceda Jr., chief sang Criminal Investigation and Detection Group Region VI, iya ginpahayag nga sang ginpatigayon ang distribution sang ayuda sang Abril 29-30, ginpanglista sang mga nasambit nga opisyal ang indi kwalipikado nga benepisyaryo.
Suno kay Balmaceda, ginlapas sang nasambit nga mga opisyal ang RA 3019 ukon ang Anti-Graft and Corruption Practices Act kag ang RA 11469 ukon ang Bayanihan to Heal as One Act.
Magluwas sa kaso kriminal, may ginahanda man nga kaso-administratibo bangud sa paglapas sa RA 6713 ukon Code of Ethical Standard of Public Official kag iga-refer sa Office of the Ombudsman.
Gintinguhaan sang Bombo News Team nga kuhaan sang pahayag si Punong Barangay Panique apang nagpamalibad na ini nga magdepensa pa apang iya ginpasalig nga atubangon niya sa korte ang nasambit nga mga kaso.
