ILOILO CITY – Madamu sang luyag ipatuman nga programa ang Punong Barangay sang North Baluarte, Molo, Iloilo City matapos ang ginpatigayon nga Lakbay Aral.
Sa interview sang Bombo Radyo kay Punong Barangay Marites Morga sang nasambit nga lugar, iya ginpahayag nga sa ginpatigayon nga Lakbay Aral, iya natun-an ang best practices sang iban nga lugar ilabi na sa patag sang Solid Waste Management, Anti-Smoking, Education kag Health Campaign lakip na ang Disaster Preparedness.
Sa ila lugar suno kay Morga, ginahulat na lang nila nga makahalin ang tanan nga illegal settlers sa bakante nga lote nga pagahamtangan sang Material Recovery Facility.
Luyag man ni Morga nga ipatuman ang pagbag-o sa pagpatigayon sang session kag pag-require sa barangay officials nga magsuksuk sang Polo Barong.
Magluwas diri, luyag man ni Morga nga mag-assign sang personnel nga magabulig sa mga barangay street sweeper nga amo ang natuon sa pagpaninlo sa barangay.
Kun mahatagan man sang kahigayunan, luyag man sang Punong Barangay nga magpatukod sang learning center para sa mga kabataan, magpatukod sang chapel kag magpahamtang sang herbal plant garden.
Walo ka mga re-entry action plan ang igapasa sang Barangay Council sang North Baluarte, Molo matapos ang ginpatigayon nga Lakbay Aral.
Suno kay Morga, tanan nga barangay official sa ila lugar nga nag-upod sa Lakbay Aral ang magapasa sang re-entry action plan santo sa mandu sang Department of Interior and Local Government.
Ginpahayag ni Morga nga buwas, Lunes, tingbon nila ang pagpasa sang re-entry action plan kun sa diin nakasaad ang summary sang ila natun-an sa Lakbay Aral.
Sa subong suno sa iya, ginatapos pa ang re-entry action plan sang niya nga mga barangay kagawad nga nag-upod sa nasambit nga aktibidad.
