Iloilo – Ginatudlo sang mga nakakita sa baylehan sa Barangay Bugtongan, Dueñas, Iloilo nga ang Punong Barangay ang una nga nanapungol sa bana sang babayi nga nagpamalibad nga mag-bayle.
Ini may kaangtanan sa pagpa-Bombo ni Dailyn Pedregosa kay Punong Barangay Danny Pedregosa nga gintudlo sang tagreklamo nga nagsumbag sa iya bana sa baylehan kadungan sang pagsaulog sang fiesta sang amo nga barangay sang Enero 21, 2023.
Sa interview sang Bombo Radyo kay Jimmy Bansagan, Kagawad sang nasambit nga barangay, iya ginpahayag nga nagresponde ini gilayon agud mapauntat ang kinagamo sa tunga sang Punong Barangay kag sang bana sang tagreklamo.
Suno sa iya, siya mismo ang naghatag sang first aid sa bana ni Pedregosa nga puno sang dugo matapos gintapungol sang Punong Barangay.
Ginpahayag sang natungdan nga naghingyo ini sang bulig sa mga kapulisan kag gindala sa banwa agud magpa-blotter.
Sandig naman sa mga nakakita suno kay Bansagan, ginpalapitan sang bana ni Pedregosa ang Punong Barangay, apang gulpiyada ini nga gintapungol sang Punong Barangay rason nga nalipong ini.
Samtang, gin-ako naman sang Punong Barangay nga nakainom ini sang duha ka botelya sang makahulubog nga ilimnon.
Sa subong, nagalaom si Dailyn nga makakuha na gilayon sang Certificate to File Action agud mahatagan sang igtalupangod ang natabo sa iya bana kag mapasakaan sang kaso ang Punong Barangay.
