Gintuad sang punong barangay sang Brgy. Bakhaw, Mandurriao, Iloilo City nga antes pa man nadakpan, nakaagi na sila istoryahanay ni Alias “Ariane” ang regional top-listed drug personality kag nagpahayag nga mabag-o na ini.
Si Alias “Ariane”, 48-anyos, residente sang Zone 2, Barangay Bakhaw, Mandurriao, Iloilo City; isa sa mga subject nga nadakpan sa drug buy-bust operation sa Barangay Calumpang, Molo.
Kaupod sini Alias “Toto”, 32-anyos, isa ka security guard kag residente sang Capiz.
Sa interview sang Bombo Radyo kay Punong Barangay Joel Alvarado sang Bakhaw, Mandurriao, iya ginpahayag nga sang bag-o ini nakaguwa sa presohan, nagpangako pa ini sa iya nga magbag-o na.
Apang makaligad ang isa ka bulan, may mga report nga nabaton ang barangay nga nagagamit si Alias Ariane, rason nga gin-monitor ini sang barangay.
Suno kay Alvarado, may kakilala si Ariane nga masami ginakadtuan sa ila lang man nga barangay nga posible kaupod man sini sa iligal nga transaksyon.
Padayon man ang koordinasyon sang Barangay Anti-Drug Abuse Council (BADAC) sa kapulisan agud magpatuman sang drug assembly kag mapahanumdom sa pumuluyo ang pagpamatok sa iligal nga druga.
Nahibaluan nga nakumpiskar kay Alias Ariane kag Alias Toto ang 1,100 grams sang suspected shabu nga nagabalor sang ginabanta P7.5 million.
Lakip na diri ang 39 ka heat-sealed plastic sachets nga may unod sang suspected shabu (lakip na ang buy-bust item),4 ka knot-tied nga plastic packs, buy-bust money kag non-drug-related items.
