ILOILO CITY – Ginpanginwala sang Punong Barangay sang Baldoza, La Paz, Iloilo City ang alegasyon tuhoy sa indi niya pagpanghatag sang donasyon nga tinapay.
Sa interview sang Bombo Radyo kay Punong Barangay Jonathan Javellana Jr., iya ginpahayag nga indi matuod ang nasambit nga alegasyon bangud nga kun may donasyon nga tinapay, iya gilayon ini nga ginapanghatag sa mga pumuluyo.
Suno kay Javellana, may yara sang feeding program nga ginapatigayon sa ila barangay agud mapuslan ang food donations.
Sa pagkamatuod suno kay Javellana, ang tanan nga donasyon kag tanan nga aktibidad nga ginapatigayon sa ila lugar ang may yara sang documentation bilang pamatuod kag ini ang naka post sa facebook account nga nakapangalan sa Barangay Baldoza Council.
May kaangtanan naman sa pagpanghatag sang Social Emelioration Program, ginpahayag sang natungdan nga may masobra sa 800 ka benepisyaryo ang wala pa nahatagan sang cash assistance.
Mahimo nga buwas, Mayo 10, maubos na sa pagpanghatag ang nabilin nga cash assistance.
