𝗠𝗢𝗟𝗢, 𝗜𝗟𝗢𝗜𝗟𝗢 𝗖𝗜𝗧𝗬 — Ginpanginwala sang punong barangay sang Brgy. Calumpang, Molo, Iloilo City nga siya ang nagbutang sang litrato ni Raisa Treñas-Chu agud nga ibaylo sa nakadukot nga laragway ni Iloilo City Lone District Representative Jamjam Baronda.
Sa interview sang Bombo Radyo kay Punong Barangay Lolita Maprangala sang Brgy. Calumpang, Molo, Iloilo City, iya ginpahayag nga gin-ingod niya lamang ang litrato agud nga ikumpara kun kapareho ang itsura ni Iloilo City Mayor Jerry Treñas sa iya anak nga si Raisa Treñas-Chu.
Suno kay Maprangala, wala ini sang tuyo nga baylohan ang litrato ni Baronda sa ila barangay hall, sa diin, wala niya natalupangdan nga wala nakakas ang litrato ni Raisa Treñas-Chu.
Ginpaathag man sang punong barangay nga ginbutang lamang ang litrato ni Raisa agud testingan bangud nakakas ang laragway ni Cong. Baronda sang may nagpadulong nga bisita sa ila nga barangay hall.
Gin-ako naman sang natungdan nga suportado niya ang kandidatura sang mga Treñas para sa 2025 midterm elections.
Nahibaluan nga nakuhaan sang litrato ang pagbaylo sang mga laragway ni Baronda kay Raisa Treñas-Chu sang nagpa-picture ang mga bisita sang secretary sang amo nga barangay.
