ILOILO CITY – Gin-athag sang mga opisyales sang Barangay McArthur, Lapaz, Iloilo City nga indi tumandok sang ila barangay ang lalaki nga ginluthang patay sang riding in tandem suspects kahapon nga adlaw sa Brgy. Rizal, Lapuz Sur, Iloilo City.
Ang biktima amo si Roy Guco, 42 anyos, kag bag-o lamang nakaguwa sa presohan may kaangtanan man sa iligal nga droga ang iya kaso.
Sa interview sang Bombo Radyo kay Punong Barangay Peter Chong, iya ginpahayag nga residente si Guco sang Arroyo, Iloilo City kag indi sa ila nga barangay.
Apang suno kay Chong, ang ka live-in partner ni Guco amo ang residente sang McArthur, Lapaz.
Dugang pa sang punong barangay, mismo sa iya nagsungka si Goco antes pa man ini ginpreso.
Indi man mapat-od ni Chong kun ano ang motibo sa pagpatay sa drug surrenderee.
