ILOILO CITY – Wala na sang osbtruction sa Brgy. Desamparados, Jaro, Iloilo City, isa ka adlaw ang nabilin sa gintalana nga plaso ni Presidente Rodrigo Duterte sa pagpatigayon sang Oplan Hawan.
Sa interview sang Bombo Radyo kay Punong Barangay Nestor Lobaton, iya ginpahayag nga kun sablag sa dalan ang pagahambalan, amat-amat na sadto pa nga ginpangkuha ang mga obstruction ilabi na ang sa palibot sang merkado.
Suno kay Lobaton, isa sa problema sa ila lugar amo ang basura kag ang gumon nga pagplastar sang mga manugbaligya sa sulod sang merkado.
Sa pihak sini, ginpahayag ni Lobaton nga bilang presidente sang Market Vendor’s Association, ang nasambit nga problema ang nasolbar na apang iya pa nga ginatinguhaan nga makapahamtang sang mas daku nga Material Recivery Facility agud nga indi mag-awas ang basura.
Samtang, ginpahayag ni Lobaton nga indi man mahinago nga ang baha ang isa sa ginaproblema sang mga pumuluyo sa ila lugar sa tion nga mag-ulan.
Ini bangud nga suno kay Lobaton, nagkitid ang Dungon Creek nga sadto anay gintampukan sang bato sang isa ka chinese businesman.
Sa pihak sini, ginpahayag sang natungdan nga planu niya nga painan sang pondo ang pagtinlo kag ang pagpahamtang sang dugang nga drainage system sa ila lugar agud nga may yara sang lutsan ang tubig.
Kun illegal drugs naman ang pagahambalan, ginpahayag sang Punong Barangay nga kun sadto, nagapanguna ang Desamparados sa 180 ka barangay sa syudad sang Iloilo apang sa subong, amat-amat na nga nabuhinan ang drug personalities sa ila lugar.
Isa man sa mga rason suno kay Lobaton amo ang kampanya sang barangay council agud nga matapna ang illegal drugs.
Sa pihak sini, gin-ako man sang natungdan nga indi man madula sang ahat ang illegal drugs apang wala man naga-untat ang gobyerno sa pagpatuman sang war on drugs campaign.
